ХНХЯ-ны харъяа Хөдөлмөрийн аюулгүй байдал, эрүүл мэндийн төвийн түүхт 50 жилийн ой тохиож байна. Ойн арга хэмжээг тохиолдуулан ХАБЭМТөвөөс “Хөдөлмөрийн аюулгүй байдал, эрүүл мэндийн тулгамдсан асуудал, шийдвэрлэх арга зам” сэдэвт онол практикийн бага хурал, “Мэргэжлээс шалтгаалах өвчний оношлогоо, урьдчилан сэргийлэлт” сэдэвт олон улсын сургалтыг 2017 оны 10 сарын 03-04-ны өдрүүдэд Corporate зочид буудлын Улаанбаатар хурлын зааланд зохион байгуулж байна. 

Өнөөдөр хөдөлмөрийн аюулгүй байдал, эрүүл ахуйн эрх зүйн орчин, мэргэжлээс шалтгаалсан өвчний оношлогоо, урьдчилан сэргийлэлт, нөхөн сэргээх тусламж үйлчилгээ, үйлдвэрлэлийн осол, мэргэжлээс шалтгаалах өвчний даатгал, хөдөлмөрийн аюулгүй байдал, эрүүл ахуйн соёл, сургалтын тулгамдсан асуудал, шийдвэрлэх арга зам сэдвүүдээр илтгэл тавьж хэлэлцүүлэг өрнүүллээ. Харин маргааш “Мэргэжлээс шалтгаалах өвчнөөс урьдчилан сэргийлэх” сэдвээр олон улсын сургалтыг зохион байгуулна.  Ð¡ÑƒÑ€Ð³Ð°Ð»Ñ‚аар мэргэжлээс шалтгаалах өвчний өнөөгийн байдал, орчин үеийн оношлогоо, урьдчилан сэргийлэлт, олон улсын болон өөрийн оронд нэвтэрч буй шинэлэг арга техник, дэвшилтэт санааг хуваалцан санал солилцох юм. 

Арга хэмжээнд Мэргэжлийн өвчин судлалын газрын эмч, мэргэжилтнүүд, хөдөлмөрийн аюулгүй байдал, эрүүл мэндийн чиглэлээр үйл ажиллагаа явуулдаг мэргэжлийн байгууллагууд, үйлдвэр уурхайн эмч, эрүүл ахуйч, АШУҮИС-ийн багш нар оролцож байна. 

Монгол улсад мэргэжлийн өвчин судлалын эмнэлэг анх 1967 онд МАХН-ын Төв хороо, сайд нарын зөвлөлийн 1966 оны 90/99 дүгээр тогтоолыг үндэслэн Эрүүлийг хамгаалах яамны сайдын 1967 оны 8 дугаар сарын 19-ний өдрийн 412 тоот тушаалаар “Улсын мэргэжлийн өвчний диспансер” нэртэйгээр байгуулагдсан. Нийгэм эдийн засгийн хөгжил, цаг үеийн шаардлагатай уялдан ХАБЭМТөв нэртэйгээр өөрчлөгдсөн билээ. 

ХАБЭМТөв нь Монгол улсын нутаг дэвсгэрт үйл ажиллагаа явуулж буй өмчийн бүх хэлбэрийн аж ахуйн нэгж, байгууллагуудын ажлын байранд хөдөлмөрийн болон эрүүл ахуйн нөхцлийг судлах, үнэлгээ өгөх, ажлын байрны аюултай хортой хүчин зүйлсийг багасгах, арилгах арга хэмжээний зөвлөгөө зөвлөмж өгөх, ажилчдад эрүүл, аюулгүй зан үйлийг төлөвшүүлэх, мэргэжлээс шалтгаалсан өвчнийг эрт илрүүлэх, эмчлэх, урьдчилан сэргийлэх, мэргэжлээс шалтгаалсан өвчний улмаас хөдөлмөрийн чадвараа алдсан (ХЧА) иргэдэд хөдөлмөр зохицуулалтын магадлал хийх, холбогдох байгууллага, мэргэжилтнүүдийг мэргэжил, арга зүйн удирдлагаар хангах үндсэн чиг үүрэг бүхий Хөдөлмөр, нийгмийн хамгаалах яамны харъяа төрийн үйлчилгээний байгууллага юм.

2017.10.03